Prezident Shavkat Mirziyoyev 10-noyabr kuni Toshkent davlat tibbiyot universitetiga tashrif buyurib, mamlakatimizda sog‘liqni saqlash tizimini raqamlashtirish, tibbiyot muassasalarida xizmat sifatini oshirish, tibbiy ta’limni takomillashtirish bo‘yicha amalga oshirilayotgan ishlar taqdimoti bilan tanishdi. So‘nggi yillarda mamlakatimiz tibbiyotida ilg‘or texnologiyalar joriy etilib, ta’lim jarayonlariga keng joriy etilmoqda. Xususan, 3 ta oliy ta’lim muassasasi negizida Toshkent davlat tibbiyot universiteti tashkil etildi. Urganch davlat tibbiyot instituti faoliyati yo‘lga qo‘yildi. 8 ta tibbiyot oliygohi xalqaro akkreditatsiyadan o‘tgan. Sohada zamonaviy bilim va ko‘nikmalarga ega kadrlar tayyorlash imkoniyatlari kengaydi.
– Zamonaviy tibbiyot muassasalari quryapmiz, sohaga sun’iy intellektni olib kiryapmiz, eng ilg‘or uskunalarni olib kelyapmiz. Bu o‘zgarishlar eng past darajaga yetishi kerak. Eng muhimi, har bir tibbiyot xodimining malakasini oshirish, ularga zamonaviy bilim va ko‘nikmalar berishga e’tibor qaratishimiz zarur. Shundagina sa’y-harakatlarimiz o‘z natijasini beradi, – dedi Prezident.
Tashrif davomida ular universitetdagi zamonaviy ta’lim muhiti va sun’iy intellekt yordamida ishlaydigan o‘quv laboratoriyalari bilan tanishdilar. Reanimatsiya, oilaviy poliklinika, shoshilinch yordam, jarrohlik, pediatriya, akusherlik va terapiya simulyatsion xonalarida talabalar o‘z bilim va ko‘nikmalarini amaliyot orqali mustahkamlamoqda. Buning uchun yaratilgan sharoitlar va istiqboldagi rejalar haqida batafsil ma’lumot berildi.
